hazaar baar zamaana idhar se guzra hai

nai nai si hai kuchh teri rahguzar phir bhi

kahoon ye kaise idhar dekh yaa na dekh udhar

ki dard dard hai phir bhi nazar nazar phir bhi

khusha ishaara-e-paiham zahe sukoot-e-nazar

daraaz ho ke fasaana hai mukhtasar phir bhi

jhapak rahi hain zamaan o makan ki bhi aankhein

magar hai quafila aamaada-e-safar phir bhi

shab-e-firaaque se aage hai aaj meri nazar

ki kat hi jaaegi ye shaam-e-be-sahar phir bhi

kahin yahi toh nahi kaashif-e-hayaat-o-mamaat

ye husn o ishq b-zaahir hain be-khabar phir bhi

palat rahe hain ghareeb-ul-watan palatna tha

wo koocha roo-kash-e-jannat ho ghar hai ghar phir bhi

luta hua chaman-e-ishq hai nigaahon ko

dikha gaya wahi kya kya gul o samar phir bhi

kharaab ho ke bhi socha kiye tire mahjoor

yahi ki teri nazar hai tiri nazar phir bhi

ho be-niyaaz-e-asar bhi kabhi tiri mitti

wo keemiya hi sahi rah gai kasar phir bhi

lipat gaya tira deewaana garche manzil se

udi udi si hai ye khaak-e-rahguzar phir bhi

tiri nigaah se bachne mein umr guzri hai

utar gaya rag-e-jan mein ye neshtar phir bhi

gham-e-firaaque ke kushton ka hashr kya hoga

ye shaam-e-hijr toh ho jaaegi sahar phir bhi

fanaa bhi ho ke giran-baari-e-hayaat na poochh

uthaae uth nahi sakta ye dard-e-sar phir bhi

sitam ke rang hain har iltifaat-e-pinhan mein

karam-numa hain tire jaur sar-b-sar phir bhi

khata-muaaf tira afw bhi hai misl-e-saza

tiri saza mein hai ik shaan-e-dar-guzar phir bhi

agarche be-khudi-e-ishq ko zamaana hua

firaaque karti rahi kaam wo nazar phir bhi