firaaque daud gai rooh si zamaane mein

kahan ka dard bhara tha mire fasaane mein

junoon se bhool hui dil pe chot khaane mein

firaaque der abhi thi bahaar aane mein

wo koi rang hai jo ud na jaae ai gul-e-tar

wo koi boo hai jo ruswa na ho zamaane mein

wo aastin hai koi jo lahoo na de nikle

wo koi hasan hai jhijhke jo rang laane mein

ye gul khile hain ki chotein jigar ki ubhri hain

nihan bahaar thi bulbul tire taraane mein

bayaan-e-shama hai haasil yahi hai jalne ka

fanaa ki kaifiytein dekh jhilmilaane mein

kasi ki haalat-e-dil sun ke uth gain aankhein

ki jaan pad gai hasrat bhare fasaane mein

usi ki sharah hai ye uthte dard ka aalam

jo daastan thi nihan tere aankh uthaane mein

gharaz ki kaat diye zindagi ke din ai dost

wo teri yaad mein hon yaa tujhe bhulaane mein

hamin hain gul hamin bulbul hamin hawa-e-chaman

firaaque khawaab ye dekha hai quaid-khaane mein