gard-o-ghubaar-e-hasti-e-faani uda diya

ai keemiya-e-ishq mujhe kya bana diya

wo saamne hai aur nazar se chhupa diya

ai ishq-e-be-hijaab mujhe kya dikha diya

wo shaan-e-khaamushi ki bahaarein hain muntazir

wo rang-e-guftugoo ki gulistan bana diya

dam le rahi thin husn ki jab sehar-kaariyan

in waqpha-ha-e-kuphr ko iman bana diya

maaloom kuchh mujhi ko hain un ki rawaaniyan

jin quatra-ha-e-ashk ko dariya bana daya

ik barque-e-be-quaraar thi tamkeen-e-husn bhi

jis waqt ishq ko gham-e-sabr-aazma diya

saaqui mujhe bhi yaad hain wo tishna-kaamiyan

jin ko hareef-e-saaghar-o-meena bana diya

maaloom hai haqueeqat-e-gham-ha-e-rozgaar

duniyaa ko tere dard ne duniyaa bana diya

ai shokhi-e-nigaah-e-karam muddaton ke baad

khawaab-e-giraan-e-gham se mujhe kyoon jaga diya

kuchh shorishein taghaaful-e-pinhan mein thin jinhein

hangaama-zaar-e-hashr-e-tamannaa bana diya

badhta hi ja raha hai jamaal-e-nazar-fareb

husn-e-nazar ko husn-e-khud-aara bana diya

phir dekhna nigaah ladi kis se ishq ki

gar husn ne hijaab-e-taghaaphul utha diya

jab khoon ho chuka dil-e-hasti-e-etibaar

kuchh dard bach rahe jinhein insan bana diya

gum-karda-e-wafoor-e-gham-e-intizaar hoon

tu kya chhupa ki mujh ko mujhi se chhupa diya

raat ab hareef-e-subhah-e-quayaamat hi kyoon na ho

jo kuchh bhi ho us aankh ko ab toh jaga diya

ab main hoon aur lutf-o-karam ke takallufaat

ye kyoon hijaab-e-ranjish-e-be-ja bana diya

thi yoon toh shaam-e-hijr magar pichhli raat ko

wo dard utha firaaque ki main muskura diya