haath aae toh wahi daaman-e-jaanan ho jaae
chhoot jaae toh wahi apna gareban ho jaae
ab bhi hai wo mahram-e-be-gaana-numa
yoon laakh chhupe laakh numaayan ho jaae
hosh-o-ghaflat se bahut door hai kaifiyyat-e-ishq
us ki har be-khabri manzil-e-irfan ho jaae
yaad aati hai jab apni toh tadap jaata hoon
meri hasti tira bhoola hawa paiman ho jaae
aankh wo hai jo tiri jalwa-gah-e-naaz bane
dil wahi hai jo saraapa tira arman ho jaae
paak-baazaan-e-mohabbat mein jo bebaaki hai
husn gar us ko samajh le toh pasheman ho jaae
sahal ho kar hui dushwaar mohabbat teri
use mushkil jo bana lein toh kuchh aasan ho jaae
ishq phir ishq hai jis roop mein jis bhes mein ho
ishrat-e-wasl bane yaa gham-e-hijran ho jaae
kuchh mudaawa bhi ho majrooh dilon ka ai dost
marham-e-zakhm tira jaur-pasheman ho jaae
ye bhi sach hai koi ulfat mein pareshan kyoon ho
ye bhi sach hai koi kyoonkar na pareshan ho jaae
ishq ko arz-e-tamannaa mein bhi laakhon pas-o-pesh
husn ke waaste inkaar bhi aasan ho jaae
jhilmilaati hai sar-e-bazm-e-jahan sham-e-khudi
jo ye bujh jaae charaagh-e-rah-e-irphan ho jaae
sar-e-shoreeda diya dasht-o-bayaaban bhi diye
ye miri khoobi-e-quismat ki wo zindan ho jaae
uqda-e-ishq ajab uqda-e-mohmal hai firaaque
kabhi la-hal kabhi mushkil kabhi aasan ho jaae
Responses
No comments yet. Be the first to respond.