tire khayaal ko kuchh chup si lag gai warna

kahaaniyon se shab-e-gham bahal toh sakti hai

uroos-e-dahar chale kha ke thokrein lekin

quadam quadam pe jawaani ubal toh sakti hai

palat pade na kahin us nigaah ka jaadoo

ki doob kar ye chhuri kuchh uchhal toh sakti hai

bujhe hue nahi itne bujhe hue dil bhi

fasurdagi mein tabeeat machal toh sakti hai

agar tu chaahe toh gham waale shaadman ho jaaein

nigaah-e-yaar ye hasrat nikal toh sakti hai

ab itni band nahi gham-kadon ki bhi raahein

hawa-e-kooch-e-mahboob chal toh sakti hai

kade hain kos bahut manzil-e-mohabbat ke

mile na chhaanw magar dhoop dhal toh sakti hai

hayaat lau tah-e-daamaan-e-marg de utthi

hawa ki raah mein ye shama jal toh sakti hai

kuchh aur maslahat-e-jazb-e-ishq hai warna

kisi se chhut ke tabeeat sambhal toh sakti hai

azal se soi hai taqudeer-e-ishq maut ki neend

agar jagaaiye karwat badal toh sakti hai

gham-e-zamaana-o-soz-e-nihan ki aanch toh de

agar na toote ye zanjeer gal toh sakti hai

shareek-e-sharm-o-haya kuchh hai bad-gumaani-e-husn

nazar utha ye jhijak si nikal toh sakti hai

kabhi wo mil na sakegi main ye nahi kahta

wo aankh aankh mein pad kar badal toh sakti hai

badalta jaae gham-e-rozgaar ka markaz

ye chaal gardish-e-ayyaam chal toh sakti hai

wo be-niyaaz sahi dil mata-e-hech sahi

magar kisi ki jawaani machal toh sakti hai

tiri nigaah sahaara na de toh baat hai aur

ki girte girte bhi duniyaa sambhal toh sakti hai

ye zor-o-shor salaamat tiri jawaani bhi

b-quaul ishq ke saanche mein dhal toh sakti hai

suna hai barf ke tukde hain dil haseenon ke

kuchh aanch pa ke ye chaandi pighal toh sakti hai

hansi hansi mein lahoo thookte hain dil waale

ye sar-zameen magar laal ugal toh sakti hai

jo tu ne tark-e-mohabbat ko ahal-e-dil se kaha

hazaar narm ho ye baat khal toh sakti hai

are wo maut ho yaa zindagi mohabbat par

na kuchh sahi kaf-e-afsos mal toh sakti hai

hain jis ke bal pe khade sarakshon ko wo dharti

agar kuchal nahi sakti nigal toh sakti hai

hui hai garm lahu pi ke ishq ki talwaar

yoon hi jilaae ja ye shaakh phal toh sakti hai

guzar rahi hai dabe paanw ishq ki dewi

subuk-rawi se jahan ko masal toh sakti hai

hayaat se nigah-e-waapsin hai kuchh maanoos

mire khayaal se aankhon mein pal toh sakti hai

na bhoolna ye hai taakheer husn ki taakheer

firaaque aai hui maut tal toh sakti hai