chhaalon ko bayaaban bhi gulzaar nazar aaya

jab chhed par aamaada har khaar nazar aaya

subh-e-shab-e-hijran ki wo chaak-garebaani

ik aalam-e-nairangi har taar nazar aaya

ho sabr ki betaabi ummeed ki maayoosi

nairang-e-mohabbat bhi be-kaar nazar aaya

jab chashm-e-siyah teri thi chhaai hui dil par

is mulk ka har khitta taataar nazar aaya

tu ne bhi toh dekhi thi wo jaati hui duniyaa

kya aakhri lamhon mein beemaar nazar aaya

ghash kha ke gire moosa allaah-ri maayoosi

halka sa wo parda bhi deewar nazar aaya

zarra ho ki quatra ho khum-khana-e-hasti mein

makhmoor nazar aaya sarshaar nazar aaya

kya kuchh na hua gham se kya kuchh na kiya gham ne

aur yoon toh hua jo kuchh be-kaar nazar aaya

ai ishq quasam tujh ko maamoora-e-aalam ki

koi gham-e-furqat mein gham-khwaar nazar aaya

shab kat gai furqat ki dekha na firaaque aakhir

tool-e-gham-e-hijran bhi be-kaar nazar aaya