miri nazrein bhi aise quatilon ka jaan o iman hain

nigaahein milte hi jo jaan aur imaan lete hain

jise kahti hai duniyaa kaamyaabi waae naadaani

use kin queemton par kaamyaab insaan lete hain

nigaah-e-baada-goon yoon toh tiri baaton ka kya kahna

tiri har baat lekin ehtiyaatan chhaan lete hain

tabeeat apni ghabraati hai jab sunsaan raaton mein

ham aise mein tiri yaadon ki chaadar taan lete hain

khud apna faisla bhi ishq mein kaafi nahi hota

use bhi kaise kar guzrein jo dil mein thaan lete hain

hayaat-e-ishq ka ik ik nafas jaam-e-shahaadat hai

wo jaan-e-naaz-bardaaran koi aasaan lete hain

ham-aahangi mein bhi ik chaashni hai ikhtilaafon ki

miri baatein b-unwaan-e-digar wo maan lete hain

tiri maqubooliyat ki wajh waahid teri ramziyyat

ki us ko maante hi kab hain jis ko jaan lete hain

ab is ko kufr maanein yaa bulandi-e-nazar jaanein

khuda-e-do-jahan ko de ke ham insaan lete hain

jise soorat bataate hain pata deti hai seerat ka

ibaarat dekh kar jis tarah maani jaan lete hain

tujhe ghaata na hone denge kaarobaar-e-ulfat mein

ham apne sar tira ai dost har ehsaan lete hain

hamaari har nazar tujh se nai saugandh khaati hai

toh teri har nazar se ham naya paimaan lete hain

rafeeque-e-zindagi thi ab anees-e-waqt-e-aakhir hai

tira ai maut ham ye doosra ehsaan lete hain

zamaana waardaat-e-qualb sunne ko tarasta hai

isi se toh sar aankhon par mira deewaan lete hain

firaaque aksar badal kar bhes milta hai koi kaafir

kabhi ham jaan lete hain kabhi pahchaan lete hain