aag mein jo pada wo aag hua

husn-e-soz-e-nihan mujassam hai

us ke shaitaan ko kahan taufeeque

ishq karna gunaah-e-aadam hai

dil ke dhadkon mein zor-e-zarb-e-kaleem

kis quadar is habaab mein dam hai

hai wahi ishq zinda-o-jaawed

jise aab-e-hayaat bhi sam hai

is mein thahraaw yaa sukoon kahan

zindagi inqalaab-e-paiham hai

ik tadap mauj-e-tah-nashin ki tarah

zindagi ki bina-e-mohkam hai

rahti duniyaa mein ishq ki duniyaa

nae unwaan se munazzam hai

uthne waali hai bazm maazi ki

raushani kam hai zindagi kam hai

ye bhi nazm-e-hayaat hai koi

zindagi zindagi ka maatam hai

ik muamma hai zindagi ai dost

ye bhi teri ada-e-mubham hai

ai mohabbat tu ik azaab sahi

zindagi be tire jahannam hai

ik talaatum sa rang-o-nikhat ka

paikar-e-naaz mein dama-dam hai

phirne ko hai raseeli neem-nigaah

aahoo-e-naaz maail-e-raam hai

roop ke jot zer-e-pairaahan

gulsitan par rida-e-shabnam hai

mere seene se lag ke so jaao

palkein bhaari hain raat bhi kam hai

aah ye meharbaaniyan teri

shaadmaani ki aankh pur-nam hai

narm o dosheeza kis quadr hai nigaah

har nazar daastaan-e-maryam hai

mehar-o-mah shola-ha-e-saaz-e-jamaal

jis ki jhankaar itni maddham hai

jaise uchhle junoon ki pahli shaam

is ada se wo zulf barham hai

yoon bhi dil mein nahi wo pahli umang

aur teri nigaah bhi kam hai

aur kyoon chhedti hai gardish-e-charkh

wo nazar phir gai ye kya kam hai

roo-kash-e-sad-hareem-e-dil hai faza

wo jahan hain ajeeb aalam hai

diye jaati hai lau sada-e-firaaque

han wahi soz-o-saaz kam kam hai