din mein ham ko dekhne waalo apne apne hain auquat

jaao na tum in khushk aankhon par ham raaton ko ro lein hain

fitrat meri ishq-o-mohabbat quismat meri tanhaai

kahne ki naubat hi na aai ham bhi kisoo ke ho lein hain

khunuk siyah mahke hue saae phail jaaein hain jal-thal par

kin jatnon se meri ghazlein raat ka jooda kholein hain

baagh mein wo khawaab-aawar aalam mauj-e-saba ke ishaaron par

daali daali nauras patte sahaj sahaj jab dolein hain

uf wo labon par mauj-e-tabassum jaise karawtein lein kaunde

haae wo aalam-e-jumbish-e-mizgan jab fitne par taulein hain

naqsh-o-nigaar-e-ghazal mein jo tum ye shaadaabi paao ho

ham ashkon mein kaaenaat ke nok-e-qualam ko dubo lein hain

in raaton ko hareem-e-naaz ka ik aalam hue hai nadeem

khalwat mein wo narm ungaliyan band-e-quaba jab kholein hain

gham ka fasaana sunne waalo aakhir-e-shab aaraam karo

kal ye kahaani phir chhedenge ham bhi zara ab so lein hain

ham log ab toh ajanbi se hain kuchh toh bataao haal-e-firaaque

ab toh tumhin ko pyar karein hain ab toh tumhin se bolein hain