phir tira gham wahi ruswa-e-jahan hai ki jo tha

phir fasaana b-hadees-e-digran hai ki jo tha

manzilein gard ke maanind udi jaati hain

wahi andaaz-e-jahaan-e-guzran hai ki jo tha

zulmat o noor mein kuchh bhi na mohabbat ko mila

aaj tak ek dhundalke ka saman hai ki jo tha

yoon toh is daur mein be-kaif si hai bazm-e-hayaat

ek hangaama sar-e-ritl-e-giran hai ki jo tha

laakh kar jaur-o-sitam laakh kar ehsaan-o-karam

tujh pe ai dost wahi waham-o-guman hai ki jo tha

aaj phir ishq do-aalam se juda hota hai

aasteenon mein liye kaun-o-makan hai ki jo tha

ishq afsurda nahi aaj bhi afsurda bahut

wahi kam kam asar-e-soz-e-nihan hai ki jo tha

nazar aa jaate hain tum ko toh bahut naazuk baal

dil mira kya wahi ai sheesha-giran hai ki jo tha

jaan de baithe the ik baar hawas waale bhi

phir wahi marahla-e-sood-o-ziyan hai ki jo tha

aaj bhi said-gah-e-ishq mein husan-e-saffaak

liye abroo ki lachakti si kaman hai ki jo tha

phir tiri chashm-e-sukhan-sanj ne chhedi koi baat

wahi jaadoo hai wahi husn-e-bayan hai ki jo tha

raat bhar husn par aae bhi gae sau sau rang

shaam se ishq abhi tak nigran hai ki jo tha

jo bhi kar jaur-o-sitam jo bhi kar ehsaan-o-karam

tujh pe ai dost wahi waham-o-guman hai ki jo tha

aankh jhapki ki idhar khatm hua roz-e-wisaal

phir bhi is din pe quayaamat ka guman hai ki jo tha

qurb hi kam hai na doori hi ziyaada lekin

aaj wo rabt ka ehsaas kahan hai ki jo tha

teera-bakhti nahi jaati dil-e-sozan ki firaaque

shama ke sar pe wahi aaj dhuan hai ki jo tha