munh khole hain ye zakhm jo bismil ke chaar paanch

phir lenge bose khanjar-e-quatil ke chaar paanch

kahne hain matlab un se hamein dil ke chaar paanch

kya kahiye ek munh hain wahan mil ke chaar paanch

dariya mein gir pada jo mira ashk ek garm

but-khaane lab pe ho gae saahil ke chaar paanch

do-chaar laashe ab bhi pade tere dar pe hain

aur aage dab chuke hain tale gil ke chaar paanch

raahein hain do majaaz o haqueeqat hai jin ka naam

raste nahi hain ishq ki manzil ke chaar paanch

ranj o taab museebat o gham yaas o dard o daagh

aah o fughan rafeeque hain ye dil ke chaar paanch

do teen jhatke doon joon hi wahshat ke zor mein

zindan mein tukde howein salaasil ke chaar paanch

farhaad o quais o waamique o azra the chaar dost

ab ham bhi aa mile toh hue mil ke chaar paanch

naaz o ada o ghamza nigah panja-e-miza

maarein hain ek dil ko ye pil pil ke chaar paanch

ima hai ye ki dewenge nau din ke baad dil

likh bheje khat mein sher jo be-dil ke chaar paanch

heere ke nau-ratan nahi tere hue hain jama

ye chaandani ke phool magar khil ke chaar paanch

meena-e-nuh-falak hai kahan baada-e-nashaat

sheeshe hain ye toh zahar-e-halaahal ke chaar paanch

naakhun karein hain zakhmon ko do do mila ke ek

the aath das so ho gae ab chhil ke chaar paanch

gar anjum-e-falak se bhi taadaad keejiye

niklein ziyaada daagh mire dil ke chaar paanch

maarein jo sar pe sil ko utha kar qualaque se ham

das paanch tukde sar ke hon aur sil ke chaar paanch

maan ai zafar tu panj-tan o chaar-yaar ko

hain sadar-e-deen ki yahi mahfil ke chaar paanch