diya apni khudi ko jo ham ne utha wo jo parda sa beech mein tha na raha

rahe parde mein ab na wo parda-nashin koi doosra us ke siwa na raha

na thi haal ki jab hamein khabar rahe dekhte auron ke aib o hunar

padi apni buraaiyon par jo nazar toh nigaah mein koi bura na raha

tire rukh ke khayaal mein kaun se din uthe mujh pe na fitna-e-roz-e-jaza

tiri zulf ke dhyaan mein kaun si shab mire sar pe hujoom-e-bala na raha

hamein saaghar-e-baada ke dene mein ab kare der jo saaqui toh haae ghazab

ki ye ahad-e-nashaat ye daur-e-tarab na rahega jahan mein sada na raha

kai roz mein aaj wo mehar-liqua hua mere jo saamne jalwa-numa

mujhe sabr o quaraar zara na raha use paas-e-hijaab-o-haya na raha

tire khanjar o tegh ki aab-e-rawan hui jab ki sabeel-e-sitam-zadgan

gae kitne hi quafile khushk-zaban koi tishna-e-aab-e-baqua na raha

mujhe saaf bataae nigaar agar toh ye poochhoon main ro ro ke khoon-e-jigar

male paanw se kis ke hain deeda-e-tar kaf-e-pa pe jo rang-e-hina na raha

use chaaha tha main ne ki rok rakhoon miri jaan bhi jaae toh jaane na doon

kiye laakh fareb karod fusoon na raha na raha na raha na raha

lage yoon toh hazaaron hi teer-e-sitam ki tadapte rahe pade khaak pe ham

wale naaz o karishma ki tegh-e-do-dam lagi aisi ki tasma laga na raha

zafar aadmi us ko na jaaniyega wo ho kaisa hi saahab-e-faham-o-zaka

jise aish mein yaad-e-khuda na rahi jise taish mein khauf-e-khuda na raha