seete hain sozan se chaak-e-seena kya ai chaaraasaaz

khaar-e-gham seene mein apne misl-e-sozan aap hain

pyar se kar ke hamaail ghair ki gardan mein haath

maarte tegh-e-sitam se mujh ko gardan aap hain

kheench kar aankhon mein apni surma-e-dumbaala-daar

karte paida sehar se nargis mein sosan aap hain

dekh kar sahra mein mujh ko pahle ghabraaya tha quais

phir jo pahchaana toh bola hazrat-e-man aap hain

ji dhadakta hai kahin taar-e-rag-e-gul chubh na jaae

sej par phoolon ki karte quasd-e-khuftan aap hain

kya mazaa hai tegh-e-quatil mein ki aksar said-e-ishq

aan kar us par ragadte apni gardan aap hain

mujh se tum kya poochhte ho kaise hain ham kya kahein

ji hi jaane hai ki jaise mushfique-e-man aap hain

pur-ghuroor o pur-takabbur pur-jafa o pur-sitam

pur-fareb o pur-dagha pur-makr o pur-fan aap hain

zulm-pesha zu़lm-shewa zu़lm-raan o zulm-dost

dushman-e-dil dushman-e-jan dushman-e-tan aap hain

yakka-taaz o neza-baaz o arabda-joo tund-khoo

tegh-zan dashna-guzaar o naawak-afgan aap hain

tasma-kash taraaz o ghaarat-gar taaraaj-saaz

kaafir yaghmaai o quazzaaque rahzan aap hain

fitna-joo bedaad-gar saffaak o azlam keena-war

garm-jang o garm-quatl o garm-kushtan aap hain

bad-mizaaj o bad-dimaagh w bad-shiaar o bad-sulook

bad-tareeque o bad-zaban bad-ahad o bad-zan aap hain

be-murawwat bewfa naa-meharban naa-aashna

mere quatil mere haasid mere dushman aap hain

ai zafar kya pa-e-quatil ke hai bose ki hawas

yoon jo bismil ho ke sargarm-e-tapeedan aap hain