hote hote chashm se aaj ashk-baari rah gai
aabroo baare tiri abr-e-bahaari rah gai
aate aate is taraf un ki sawaari rah gai
ki dil mein aarzoo-e-jan-nisaari rah gai
ham ko khatra tha ki logon mein tha charcha aur kuchh
baat khat aane se tere par hamaari rah gai
tukde tukde ho ke ud jaaega sab sang-e-
dil mein baad-az-marg kuchh gar be-quaraari rah gai
itna miliye khaak mein jo khaak mein dhoonde koi
khaaksaari khaak ki gar khaaksaari rah gai
aao gar aana hai kyoon gin gin ke rakhte ho quadam
aur koi dam ki hai yan dam-shumaari rah gai
ho gaya jis din se apne dil par us ko ikhtiyaar
ikhtiyaar apna gaya be-ikhtiyaari rah gai
jab quadam us kaafir-e-bad-kesh ki jaanib badhe
door pahunche sau quadam parhez-gaari rah gai
kheenchate hi tegh ada ke dam hua apna hawa
aah dil mein aarzoo-e-zakhm-e-kaari rah gai
aur toh gham-khwaar saare kar chuke gham-khwaargi
ab faquat hai ek gham ki gham-gusaari rah gai
shikwa ayyaari ka yaaron se baja hai ai zafar
is zamaane mein yahi hai rasm-e-yaari rah gai
Responses
No comments yet. Be the first to respond.
lagta nahin hai dil mera ujRe dayaar mein
kis ki bani hai aalam-e-na-paaydaar mein
umr-e-daraaz maang ke laaye the chaar din
do aarzu mein kaT gaye do intezaar mein
kitna hai bad-naseeb zafar dafn ke liye
do gaz zameen bhi na mili koo-e-yaar mein
na kisi ki aankh ka noor hoon na kisi ke dil ka qaraar hoon
jo kisi ke kaam na aa sake main vo ek musht-e-ghubaar hoon
baat karni mujhe mushkil kabhi aisi to na thi
jaisi ab hai teri mehfil kabhi aisi to na thi
bulbul ko baaghbaan se na sayyaad se gila
qismat mein qaid likhi thi fasl-e-bahaar mein