wo gulon mein gulon ki si boo na rahi wo azeezon mein lutf ki khoo na rahi

wo haseenon mein rang-e-wafa na raha kahein aur ki kya wo hamin na rahe

na wo aan rahi na umang rahi na wo rindi o zohad ki jang rahi

soo-e-quibla nigaahon ke rukh na rahe aur dar pe naqsh-e-jabin na rahe

na wo jaam rahe na wo mast rahe na fidaai-e-ahad-e-alast rahe

wo tareequa-e-kaar-e-jahan na raha wo mashaaghil-e-raunaque-e-din na rahe

hamein laakh zamaana lubhaae toh kya nae rang jo charkh dikhaae toh kya

ye muhaal hai ahal-e-wafa ke liye gham-e-millat o ulfat-e-din na rahe

tire koocha-e-zulf mein dil hai mira ab use main samajhta hoon daam-e-bala

ye ajeeb sitam hai ajeeb jafa ki yahan na rahe toh kahin na rahe

ye tumhare hi dam se hai bazm-e-tarab abhi jaao na tum na karo ye ghazab

koi baith ke lutf uthaaega kya ki jo raunaque-e-bazm tumhin na rahe

jo thin chashm-e-falak ki bhi noor-e-nazar wahi jin pe nisaar the shams o quamar

so ab aisi miti hain wo anjumnein ki nishaan bhi un ke kahin na rahe

wahi soortein rah gain pesh-e-nazar jo zamaane ko pherein idhar se udhar

magar aise jamaal-e-jahan-aara jo the raunaque-e-roo-e-zamin na rahe

gham o ranj mein akbar agar hai ghira toh samajh le ki ranj ko bhi hai fanaa

kisi shay ko nahi hai jahan mein baqua wo ziyaada malool o hazin na rahe