tawajjoh apni ho kya fann-e-shaairi ki taraf

nazar har ek ki jaati hai aib hi ki taraf

likha hua hai jo rona mire muqaddar mein

khayaal tak nahi jaata kabhi hansi ki taraf

tumhaara saaya bhi jo log dekh lete hain

wo aankh utha ke nahi dekhte pari ki taraf

bala mein phansata hai dil muft jaan jaati hai

khuda kisi ko na le jaae us gali ki taraf

kabhi jo hoti hai takraar ghair se ham se

toh dil se hote ho dar-parda tum usi ki taraf

nigaah padti hai un par tamaam mahfil ki

wo aankh utha ke nahi dekhte kisi ki taraf

nigaah us but-e-khud-bin ki hai mire dil par

na aaine ki taraf hai na aarsi ki taraf

qubool keejiye lillaah tohfa-e-dil ko

nazar na keejiye is ki shikastagi ki taraf

yahi nazar hai jo ab quatil-e-zamaana hui

yahi nazar hai ki uthti na thi kisi ki taraf

ghareeb-khana mein lillaah do-ghadi baitho

bahut dinon mein tum aae ho is gali ki taraf

zara si der hi ho jaaegi toh kya hoga

ghadi ghadi na uthaao nazar ghadi ki taraf

jo ghar mein poochhe koi khauf kya hai kah dena

chale gae the tahalte hue kisi ki taraf

hazaar jalwa-e-husn-e-butan ho ai akbar

tum apna dhyaan lagaae raho usi ki taraf