bhari hai anjuman lekin kisi se dil nahi milta

hamin mein aa gaya kuchh naqs yaa kaamil nahi milta

puraani raushani mein aur nai mein farque itna hai

use kashti nahi milti ise saahil nahi milta

pahunchana daad ko mazloom ka mushkil hi hota hai

kabhi quazi nahi milte kabhi quatil nahi milta

hareefon par khazaane hain khule yan hijr-e-gesoo hai

wahan pe bil hai aur yan saamp ka bhi bil nahi milta

ye husn o ishq hi ka kaam hai shubah karein kis par

mizaaj un ka nahi milta hamaara dil nahi milta

chhupa hai seena o rukh dil-sitan haathon se karwat mein

mujhe sote mein bhi wo husn se ghaafil nahi milta

hawaas-o-hosh gum hain bahar-e-irfaan-e-ilaahi mein

yahi dariya hai jis mein mauj ko saahil nahi milta

kitaab-e-dil mujhe kaafi hai akbar dars-e-hikmat ko

main spensar se mustaghni hoon mujh se mil nahi milta