na haasil hua sabr-o-aaraam ka
na nikla kabhi tum se kuchh kaam ka
mohabbat ka nashsha rahe kyoon na har-dam
bhara hai mai-e-ishq se jaam dil ka
phansaaya toh aankhon ne daam-e-bala mein
magar ishq mein ho gaya naam dil ka
hua khawaab ruswa ye ishq-e-butan mein
khuda hi hai ab mere badnaam dil ka
ye baanki adaaein ye tirchhi nigaahein
yahi le gain sabr-o-aaraam dil ka
dhuan pahle uthta tha aaghaaz tha wo
hua khaak ab ye hai anjaam dil ka
jab aaghaaz-e-ulfat hi mein jal raha hai
toh kya khaak batlaaoon anjaam dil ka
khuda ke liye pher do mujh ko saahab
jo sarkaar mein kuchh na ho kaam dil ka
pas-e-marg un par khula haal-e-ulfat
gai le ke rooh apni paighaam dil ka
tadapta hua yoon na paaya hamesha
kahoon kya main aaghaaz-o-anjaam dil ka
dil us be-wafa ko jo dete ho akbar
toh kuchh soch lo pahle anjaam dil ka
Responses
No comments yet. Be the first to respond.
hungaama hai kyun barpa thoRi si jo pee li hai
daaka to nahin daala chori to nahin ki hai
duniya mein hoon duniya ka talabgaar nahin hoon
baazaar se guzra hoon khareedaar nahin hoon
hum aah bhi karte hain to ho jaate hain badnaam
vo qatl bhi karte hain to charcha nahin hota
ishq naazuk-mizaaj hai behad
aql ka bojh uTha nahin sakta
rahega ishq-e-but mein faraq dunia se deeni ka
agar ye sajda hai kaabe ka vo sajda hai kuchh aur
rahta sukhan se naam qayaamat talak hai
ye zinda-jaaved hai vo murda-zabaan nahin