lateef o khush-waza chust-o-chaalaak o saaf-o-paakeeza shaad-o-khurram

tabeeaton mein hai un ki jaudat dilon mein un ke hain nek iraade

kamaal mehnat se padh rahe hain kamaal ghairat se badh rahe hain

sawaar mashrique ki raah mein hain toh maghribi raah mein piyaade

har ik hai un mein ka be-shak aisa ki aap use jaante hain jaisa

dikhaae mahfil mein quadd-e-raana jo aap aaein toh sar jhuka de

faqueer maangein toh saaf kah dein ki tu hai mazboot ja kama kha

qubool farmaaein aap daawat toh apna sarmaaya kul khila de

buton se un ko nahi lagaawat mison ki lete nahi wo aahat

tamaam quwwat hai sarf-e-khwaandan nazar ke bhole hain dil ki saade

nazar bhi aae jo zulf-e-pechan toh samjhein ye koi paalisi hai

ilektrik laaeet us ko samjhein jo barque-wash koi koi de

nikalte hain kar ke ghol-bandi b-naam-e-tahzeeb o dard-mandi

ye kah ke lete hain sab se chande hamein jo tum do tumhein khuda de

unhein isi baat par yaqueen hai ki bas yahi asal kaar-e-din hai

isi si hoga farogh-e-quaumi isi se chamkenge baap daade

makaan-e-kolej ke sab makin hain abhi unhein tajarbe nahi hain

khabar nahi hai ki aage chal kar hai kaisi manzil hain kaisi jaade

dilon mein un ke hai noor-e-iman quawi nahi hai magar nigahban

hawa-e-mantique ada-e-tifli ye shama aisa na ho bujha de

fareb de kar nikaale matlab sikhaae tahqueer-e-deen-o-mazhab

mita de aakhir ko waz-e-millat numood-e-zaati ko gar badha de

yahi bas akbar ki iltija hai janaab-e-baari mein ye dua hai

uloom-o-hikmat ka dars un ko profesar dein samajh khuda de