ishq ke izhar mein har-chand ruswaai toh hai

par karoon kya ab tabeeat aap par aai toh hai

aap ke sar ki quasam mere siwa koi nahi

be-takalluf aaiye kamre mein tanhaai toh hai

jab kaha main ne tadapta hai bahut ab dil mira

hans ke farmaaya tadapta hoga saudaai toh hai

dekhiye hoti hai kab raahi soo-e-mulk-e-adam

khana-e-tan se hamaari rooh ghabraai toh hai

dil dhadakta hai mira loon bosa-e-rukh yaa na loon

neend mein us ne dulaai munh se sarkaai toh hai

dekhiye lab tak nahi aati gul-e-aariz ki yaad

sair-e-gulshan se tabeeat ham ne bahlaai toh hai

main bala mein kyoon phansoon deewaana ban kar us ke saath

dil ko wahshat ho toh ho kambakht saudaai toh hai

khaak mein dil ko milaaya jalwa-e-raftaar se

kyoon na ho ai naujwan ik shaan-e-raanaai toh hai

yoon murawwat se tumhare saamne chup ho rahein

kal ke jalson ki magar ham ne khabar paai toh hai

baada-e-gul-rang ka saaghar inaayat kar mujhe

saaquiya taakheer kya hai ab ghata chhaai toh hai

jis ki ulfat par bada daawa tha kal akbar tumhein

aaj ham ja kar use dekh aae harjaai toh hai