naawak-fagni se zaalim ki jangal mein hai ik sannaata sa

murghaan-e-khush-alhan ho gae chup aahoo ne uchhalna chhod diya

kyoon kibr-o-ghuroor is daur pe hai kyoon dost falak ko samjha hai

gardish se ye apni baaz aaya yaa rang badalna chhod diya

badli wo hawa guzra wo saman wo raah nahi wo log nahi

tafreeh kahan aur sair kuja ghar se bhi nikalna chhod diya

wo soz-o-gudaaz us mahfil mein baaqui na raha andher hua

parwaanon ne jalna chhod diya shamon ne pighalna chhod diya

har gaam pe chand aankhein nigran har mod pe ik lesans-talab

us paark mein aakhir ai akbar main ne toh tahalna chhod diya

kya deen ko quwwat dein ye jawan jab hausla-afza koi nahi

kya hosh sambhaalein ye ladke khud us ne sambhalna chhod diya

iqubaal musaaid jab na raha rakkhe ye quadam jis manzil mein

ashjaar se saaya door hua chashmon ne ubalna chhod diya

allaah ki raah ab tak hai khuli aasaar-o-nishan sab quaem hain

allaah ke bandon ne lekin us raah mein chalna chhod diya

jab sar mein hawa-e-taaat thi sarsabz shajar ummeed ka tha

jab sar-sar-e-isyan chalne lagi is ped ne phalna chhod diya

us hoor-laqua ko ghar laae ho tum ko mubaarak ai akbar

lekin ye quayaamat ki tum ne ghar se jo nikalna chhod diya