maarifat khaalique ki aalam mein bahut dushwaar hai

shahar-e-tan mein jab ki khud apna pata milta nahi

ghaafilon ke lutf ko kaafi hai duniyaawi khushi

aaquilon ko be-gham-e-uqba mazaa milta nahi

kashti-e-dil ki ilaahi bahar-e-hasti mein ho khair

naakhuda milte hain lekin ba-khuda milta nahi

ghaafilon ko kya sunaaoon daastaan-e-ishq-e-yaar

sunne waale milte hain dard-aashna milta nahi

zindagaani ka mazaa milta tha jin ki bazm mein

un ki quabron ka bhi ab mujh ko pata milta nahi

sirf zaahir ho gaya sarmaaya-e-zeb-o-safa

kya taajjub hai jo baatin ba-safa milta nahi

pukhta tabaon par hawaadis ka nahi hota asar

kohsaaron mein nishaan-e-naqsh-e-pa milta nahi

shaikh-saahib barahman se laakh bartein dosti

be-bhajan gaae toh mandir se tika milta nahi

jis pe dil aaya hai wo sheerin-ada milta nahi

zindagi hai talkh jeene ka mazaa milta nahi

log kahte hain ki bad-naami se bachna chahiye

kah do be us ke jawaani ka mazaa milta nahi

ahal-e-zaahir jis quadar chaahein karein bahas-o-jidaal

main ye samjha hoon khudi mein toh khuda milta nahi

chal base wo din ki yaaron se bhari thi anjuman

haae afsos aaj soorat-aashna milta nahi

manzil-e-ishaque-o-tawakkul manzil-e-ezaaz hai

shaah sab baste hain yan koi gada milta nahi

baar takleephon ka mujh par baar-e-ehsan se hai sahal

shukr ki ja hai agar haajat-rawa milta nahi

chaandani raatein bahaar apni dikhaati hain toh kya

be tire mujh ko toh lutf ai mah-laqua milta nahi

maani-e-dil ka kare izhar akbar kis tarah

lafz mauzoon bahar-e-kashf-e-muddaa milta nahi