apne pahloo se wo ghairon ko utha hi na sake
un ko ham quissa-e- apna suna hi na sake
zehan mera wo quayaamat ki do-aalam pe muheet
aap aise ki mire zehan mein aa hi na sake
dekh lete jo unhein toh mujhe rakhte maazoor
shaikh-saahib magar us bazm mein ja hi na sake
aql mahangi hai bahut khilaaf-e-tahzeeb
dil ko is ahad mein ham kaam mein la hi na sake
ham toh khud chaahte the chain se baithein koi dam
aap ki yaad magar dil se bhula hi na sake
ishq kaamil hai usi ka ki patangon ki tarah
taab nazzaara-e-maashooque ki la hi na sake
daam-e-hasti ki bhi tarkeeb ajab rakkhi hai
jo phanse us mein wo phir jaan bacha hi na sake
mazhar-e-jalwa-e-jaanan hai har ik shay akbar
be-adab aankh kisi samt utha hi na sake
aisi mantique se toh deewaangi behtar akbar
ki jo khaalique ki taraf dil ko jhuka hi na sake
Responses
No comments yet. Be the first to respond.
hungaama hai kyun barpa thoRi si jo pee li hai
daaka to nahin daala chori to nahin ki hai
duniya mein hoon duniya ka talabgaar nahin hoon
baazaar se guzra hoon khareedaar nahin hoon
hum aah bhi karte hain to ho jaate hain badnaam
vo qatl bhi karte hain to charcha nahin hota
ishq naazuk-mizaaj hai behad
aql ka bojh uTha nahin sakta
rahega ishq-e-but mein faraq dunia se deeni ka
agar ye sajda hai kaabe ka vo sajda hai kuchh aur
rahta sukhan se naam qayaamat talak hai
ye zinda-jaaved hai vo murda-zabaan nahin