suna hai rabt hai us ko kharaab-haalon se

so apne aap ko barbaad kar ke dekhte hain

suna hai dard ki gaahak hai chashm-e-naaz us ki

so ham bhi us ki gali se guzar ke dekhte hain

suna hai us ko bhi hai sher o shaairi se shaghaf

so ham bhi mojize apne hunar ke dekhte hain

suna hai bole toh baaton se phool jhadte hain

ye baat hai toh chalo baat kar ke dekhte hain

suna hai raat use chaand takta rahta hai

sitaare baam-e-falak se utar ke dekhte hain

suna hai din ko use titliyan sataati hain

suna hai raat ko jugnoo thahar ke dekhte hain

suna hai hashr hain us ki ghazaal si aankhein

suna hai us ko hiran dasht bhar ke dekhte hain

suna hai raat se badh kar hain kaakulein us ki

suna hai shaam ko saae guzar ke dekhte hain

suna hai us ki siyah-chashmagi quayaamat hai

so us ko surma-farosh aah bhar ke dekhte hain

suna hai us ke labon se gulaab jalte hain

so ham bahaar pe ilzaam dhar ke dekhte hain

suna hai aaina timsaal hai jabin us ki

jo saada dil hain use ban-sanwar ke dekhte hain

suna hai jab se hamaail hain us ki gardan mein

mizaaj aur hi laal o guhar ke dekhte hain

suna hai chashm-e-tasawwur se dasht-e-imkan mein

palang zaawiye us ki kamar ke dekhte hain

suna hai us ke badan ki taraash aisi hai

ki phool apni quabaaein katar ke dekhte hain

wo sarw-quad hai magar be-gul-e-muraad nahi

ki us shajar pe shagoofe samar ke dekhte hain

bas ik nigaah se lutta hai quafila dil ka

so rah-rawaan-e-tamannaa bhi dar ke dekhte hain

suna hai us ke shabistan se muttasil hai bahisht

makin udhar ke bhi jalwe idhar ke dekhte hain

ruke toh gardishein us ka tawaaf karti hain

chale toh us ko zamaane thahar ke dekhte hain

kise naseeb ki be-pairhan use dekhe

kabhi kabhi dar o deewar ghar ke dekhte hain

kahaaniyan hi sahi sab mubaalghe hi sahi

agar wo khawaab hai taabeer kar ke dekhte hain

ab us ke shahar mein thahrein ki kooch kar jaaein

faraaz aao sitaare safar ke dekhte hain